Os galegos movémonos polo mundo cunha vantaxe e unha sorte moi especial: atopamos a nosa casa en case calquera recuncho. Hai unha Galicia fóra de Galicia que sempre acolle ao recentemente chegado e que coida e mantén, a pesar da distancia e os anos, o lazo que a une coa “terra nai”.
Esa ponte, por suposto, percórrese en ambas as direccións. Os que permanecemos aquí tamén sentimos ese vínculo extraordinario cos que están fóra e cos seus descendentes; esa sensación de que, por moitos quilómetros ou océanos que nos separen, hai moito máis que nos une. Ao final, todos somos Galicia e, por iso, o espírito de convivencia, solidariedade e irmandamento é exactamente o mesmo aquí que fóra das nosas fronteiras.
Desde a Xunta sabémolo ben. Sabemos que, ás veces, hai galegos do exterior que se atopan en situacións complicadas, e necesitan un apoio extra. Por iso, habilitamos axudas económicas, especialmente naqueles países onde é máis escasa a asistencia social.
Sabemos, tamén, que nosos case dous centenares de casas e centros de galegos fan un traballo extraordinario apoiando ás súas comunidades, mantendo a nosa cultura e a nosa lingua e este ano, ademais, promocionando de forma especialmente intensa o noso Camiño de Santiago. Por iso tamén colaboramos con elas para que se manteñan fortes e activas e para que atraian ás novas xeracións, porque queremos que ese lazo irrompible que nos une continúe forte moitos anos máis.
E, por suposto, sabemos que hai moitos galegos que queren volver á súa casa e refacer a súa vida aquí. Moitos galegos que, ademais, atesouran un gran talento que contribuirá a mellorar e a facer avanzar Galicia. Por iso, traballamos de forma intensa para que todo o que queira volver, poida volver. Fomos pioneiros en poñer en marcha unha Estratexia neste sentido, a ‘Galicia Retorna’ e, de feito, conseguimos nos últimos anos que volvan un gran número de galegos do exterior, moitos deles novos.
“Aquí son -sodes- todos benvidos. Isto non é unha mera palabra ou formalidade: arbitramos unha completa política de benvida que cubra as principais circunstancias ou problemas que poida afrontar un galego retornado”
Aquí son -sodes- todos benvidos. Isto non é unha mera palabra ou formalidade: arbitramos unha completa política de benvida que cubra as principais circunstancias ou problemas que poida afrontar un galego retornado. Falo, por exemplo, de bolsas de formación para a excelencia académica para aproveitar todo ese talento novo; de apoio ao emprendemento para os que, ao chegar, queiran poñer en marcha a súa idea para construír unha vida mellor e para xerar, ao mesmo tempo, riqueza local; e de apoio social, porque sabemos que cambiar dun país non é fácil e, en ocasións, é necesario un reforzo económico transitorio.
En definitiva, o que quero dicir é que as nosas políticas teñen moi presentes a ese medio millón de galegos que están fóra, cos que mantemos un diálogo e contacto constante. De feito, España Exterior exerce un papel fundamental á hora de ter sempre abertos estas canles de comunicación, e lévao facendo nada menos que 25 anos. A través das súas páxinas e os seus contidos dixitais podemos facer chegar as nosas propostas, pero, sobre todo, podemos coñecer as necesidades e demandas das nosas comunidades. A publicación convértese, así, nun punto de encontro, unha praza na que reunirnos e compartir información para seguir estando unidos na distancia.
Conseguir realizar isto durante un cuarto de século é un mérito maior. Por iso, moitas felicidades a España Exterior e a todo o equipo que o fai posible. E un desexo: mil primaveras máis. Os galegos -os de fóra e os de aquí- seguirémolo celebrando convosco.